Mwimbaji wimbo wa kunyatanyata Menonite Tabata Choir, Elikana Simatya

Unapousikia au kuutazama wimbo ulioimbwa na kwaya ya Kanisa la Memonite Tabata, “WANA KUNYATANYATA ”(Menonite Tabata Choir) unaweza kujiuliza ni nani yule mwimbaji wa kiume anayeonekana kiongozi na mwimbaji mkuu wa kwaya hiyo iliyovuma sana miaka ya 2000 mpaka 2010  nchini Tanzania na Afrika Mashariki kwa ujumla. Wengi ukiwauliza watakujibu pengine ni kiongozi tu wa kwaya hiyo, wengine hudhani labda ni mwinjilisti au hata mchungaji katika kanisa hilo.

Si watu wengi wanaolifahamu jina lake halisi wala historia yake kwa ujumla. Binafsi ni mpaka hivi karibuni wakati nikisikiliza kipindi kimoja  cha redio TI FM kijulikanacho kama Gospel Vibration kinlichorushwa hewani siku ya Jumatano Alasiri ndipo nikabaini kuwa mwimbaji huyo maarufu anajulikana kwa jina la ELIKANA SIMATYA MBIJIMA mzaliwa wa Mkoa wa Dodoma.

Mwimbaji Elikana Simatya anasema kuwa alianza kuimba alipokuwa na miaka 5 hapo mwaka 1975 baada ya kuwa alikuwa akiiba gitaa la kaka zake walipotoka na kuanza kujifunza kupiga mwenyewe. Baada ya kaka zake hao kubaini kuwa mdogo wao alikuwa na kipaji kikubwa cha uimbaji na tayari alikuwa ameshaanza kujua kupiga gitaa ndipo sasa walipoamua rasmi kumruhusu kulichezea gitaa hilo kwa nafasi kwa lengo la kujifunza zaidi.

Anasema katika maisha yake ya uimbaji amewahi kuwa mwalimu wa kwaya mbalimbali jijini Dar es salaam ikiwemo hii ya kanisa la Menonite Tabata ambayo alihudumu nayo mpaka mwaka 2008 alipoachana nayo na kujiunga na kwanya nyinginezo jijini Dar es salaam. Yeye Kama Mwalimu huwa anaitwa na makanisa mbalimbali ambapo baada ya mazungumzo huanza kuzifundisha kwaya za makanisa hayo. Alipoulizwa ni kwanini asianzishe uimbaji binafsi kama wafanyavyo waimbaji wengi siku hizi alijibu kwamba, swali hilo amewahi kuulizwa na watu wengi  ambao mwisho wake humcheka na kumwambia kwanini anakufa masikini wakati ana kipaji kikubwa namna ile, lakini yeye huwajibu kuwa huduma anayoitoa  si kwa ajili ya kupata faida inayoonekana kwa macho ya nyama bali zaidi ni kwa ajili ya kuwagusa watu katika kumwabudu Mungu.

Akitolea mfano wa albamu hiyo ya kunyatanyata, anasema kuwa kipindi hicho iliingiza fedha kiasi kikubwa karibu shilingi milioni 90 za Kitanzania lakini zilikuwa ni mali ya kwaya na kanisa na wala siyo mali ya mtu mmojammoja.

Elikana Simatya pia alitaja sababu kubwa inayochangia kudorora kwa kwaya nyingi siku hizi tofauti na kama ilivyokuwa miaka michache iliyopita kuwa ni kukosekana kwa motisha kwa wanakwaya mfano wanakwaya hupendelea kupata ziara kwenda kuimba makanisa mengine au mialiko mbalimbali lakini hawapati fursa kama hizo jambo linalowapunguzia motisha wa kuendelea kuimba.

Halikadhalika pia suala la maslahi, wanakwaya wengine hawana ule moyo wa kuona mapato ya kwaya yakiendelea kuwa mali ya kanisa kwa ujumla wakati wao wenyewe ndio wanaoimba, anasema kwa mfano katika kanisa la Menonite Tabata nyakati hizo uongozi wa kanisa uliamua kwaya kuwa na akaunti ili kusimamia mapato yao wenyewe na ilichangia sana mafanikio ya kwaya hiyo. Anashauri makanisa kujali maslahi na motisha kwa wanakwaya ili kurudisha msisimko wa kwaya uliokuwepo miaka ya nyuma badala ya waimbaji wengi kukimbilia kuimba binafsi au katika nyimbo za kidunia.

Bwana Elikana ana mke mmoja na watoto watatu ambao kati yao wawili tayari wamekwisha olewa huku mmoja bado akiwa anaendelea na masomo yake.

Pamoja na Bwana Elikana Simatya kwa sasa kuwa anaendelea na shughuli za kufundisha kwaya mbalimbali za makanisa jijini lakini bado ana nia ya kutoa kazi zake binafsi na anasema tayari kuna albamu yake nzima aliyoiandaa miaka 10 iliyopita lakini ikakwama studio kutokana na mgogoro wa kimaslahi baina ya mzalishaji wa albamu hiyo na muuzaji. Hata hivyo anasema bado anayo nia ya kuitoa kazi yake hiyo na anaamini kutokana na uzuri wake ni lazima itafanya vizuri sokoni. Kazi zake mbalimbali alizozitoa mwenyewe mbali na zile alizozitoa akiwa na kwaya mbalimbali zipo katika mtandao wa You tube na link zake zimewekwa hapo chini.

Blogu hii ipo chini ya Bwana Elikana Simatya mwenyewe na makala na michango ya mawazo hutoka kwa mashabiki wake mbalimbali wa zamani na pia wa sasa hivi. Hata hivyo Nyimbo zote  alizoimba na kwaya mbalimbali ikiwemo Tabata Mennonite ukiacha zle zilizoimba binafsi kama ule wa Msafiri zimewekwa hapa kwa hisani ya kwaya hizo na si kama mali binafsi ya Mwalimu Elikana Simatya.  

Tweet